VOV4.Êđê- Tlam hruê 5/9, ti Anôk bruă Knŭk kna, Khua knŭk kna Phạm Minh Chính drông leh Pô bi ala mơ̆ng Khua mil čhil Mi kơ yan adiê John Kerry nao čhưn mă bruă ti Việt Nam. Hlăm mmông drông, dua tĭng hrăm mbĭt mđĭ kyar klei bi hgŭm kluôm Việt Nam - Mi ƀrư̆ hruê klă sĭt, êlam, hơĭt kjăp hlăm tur knơ̆ng dưi mpŭ, êngiê, kluôm ênŭm lăn ala leh anăn klei bhiăn kđi čar, hrăm mbĭt gĭr ktưn mđing kơ hnơ̆ng klei bi hgŭm mrâo sĭt mâo klei găl. Khua knŭk kna Phạm Minh Chính bi mni kơ Mi mđĭ ktang klei bi hgŭm hŏng dŭm ala čar, mơ̆ng anăn đru mguôp jăk hĭn kơ klei êđăp ênang, hơĭt kjăp, bi hgŭm, mđĭ kyar ti krĭng wăl.

Việt Nam čang hmăng Mi srăng lŏ dơ̆ng bi êdah klei ƀuăn rơ̆ng ktang hŏng bruă nao ai hŏng bruă klam phŭn mơ̆ng ASEAN, klei bi hgŭm ASEAN- Mi leh anăn klei bi hgŭm Mê Kông - Mi. Pô bi ala Kerry lŏ bi mklă, Mi dlăng myuôm klei bi hgŭm ƀĭng hgŭm kluôm hŏng Việt Nam, nao ai hŏng Việt Nam ngă bruă klam phŭn, klă sĭt ti krĭng wăl leh anăn hlăm klei mdrơ̆ng hŏng dŭm bruă lu ala čar, hlăm anăn mâo klei bi mlih yan adiê.

Pô mblang: H’Zawut Ƀuôn Yă