Khua knŭk kna bi êdah klei mgei ai tiê, lač jăk kơ Khua phŭn bruă Jakkapong Sangmanee mbĭt hŏng êpul bi ala mơ̆ng Thailand hriê ti Việt Nam čang ênuh Khua gĭt gai Đảng Nguyễn Phú Trọng, mñă ktang anei jing klei bi klă kơ klei hgŭm mguôp leh anăn bi kah mbha plah wah khua gĭt gai leh anăn mnuih ƀuôn sang dua lăn čar.

Ƀri wưng anei, Khua knŭk kna lŏ bơ̆k bâo kơ klei jak iêo mơ̆ng Khua knŭk kna Thailand Srettha Thavisin hriê čuă Việt Nam leh anăn gĭt gai klei kƀĭn knŭk kna mbĭt Việt Nam – Thailand gưl tal 4 hlăm wưng găl guôp. Dua tĭng ăt bi trông leh anăn tŭ ư kơ hdră êlan bi mguôp dua ala čar hlăm wưng kơ anăp, mâo wăt hdră êlan “3 mkŏ”, mđĭ hĭn klei bi mguôp hlăm bruă răng mgang klei êđăp ênang, mnia mblei, hiu čhưn ênguê leh anăn êlan klông dŭ mdiăng, hlăm anăn kñăm bi mguôp ktang hĭn hlăm bruă êdeh phiơr, êlan dơ̆ng, êlan êdeh treng.