VOV4.Êđê- Ti anôk bruă knŭk kna, Khua knŭk kna Phạm Minh Chính drông leh Pô bi ala Mongolia hriê kkuh ƀrĭ wưng păn ngă bruă klam ti Việt Nam. Ti knăm anei, Khua knŭk kna Phạm Minh Chính mñă klă, dua ala čar mâo klei bi mjĕ hgŭm bruă mơ̆ng đưm, bi đru hdơ̆ng găp hlăm hdră mkŏ mkra lehanăn mđĭ kyar lăn čar, hlăk klei ruă Covid 19 hmăi truh amâo jăk kơ boh klei mâo hlăm tar rŏng lăn ƀiădah klei bi mjĕ hgŭm bruă ăt dưi krơ̆ng kjăp lehanăn mđĭ kyar.

Khua knŭk kna mtă kơ dua ala čar lŏ dơ̆ng sa ai hlăm dŭm klei bi kƀĭn trông lu tĭng lehanăn Mongolia lŏ sa ai hŏng klei mĭn mơ̆ng ASEAN lehanăn Việt Nam hlăm bruă msir mghaih êđăp ênang dŭm klei bi kuan mmiă, rơ̆ng klei êđăp ênang ala čar, klei êđăp ênang êlan phiơr, êlan êa ti krĭng Êa ksĭ Ngŏ. Pô bi ala Mongolia tŭ ư hŏng klei ba mdah hgŭm bruă mơ̆ng Khua knŭk kna Phạm Minh Chính, mñă klă srăng gĭr bi hgŭm kjăp hŏng dŭm anôk bruă mơ̆ng Việt Nam kñăm mtrŭt mđĭ hĭn klei bi mjĕ lehanăn hgŭm bruă mâo mơ̆ng đưm plah wah dua ala čar, mtrŭt mđĭ hdră bi hgŭm bruă duh mkra, mnia mblei, duh bi liê, bruă êlan klông dŭ mdiăng lehanăn bi mjĕ mjuk mnuih ƀuôn sang.

                                                    Pô mblang: H’Nêč Êñuôl