Hlăm klei bi kƀĭn, Khua knŭk kna Phạm Minh Chính bi mni kơ phung  khua gĭt gai dŭm phŭn, dhar bruă, alŭ wăl gĭr pŏk ngă “Hdră êlan Quang Trung” leh anăn mñă klă anei jing ai tiê kyua mnuih ƀuôn sang; bi êdah hdră êlan srăng mjưh ruĕ jăk siam, hlăm anăn, 34.759 boh sang bi leh bruă mkra mđĭ, mnuih ƀuôn sang wĭt leh kơ sang leh anăn hdĭp mda msĕ aguah tlam.

Hŏng sang mkra mrâo, Khua knŭk kna lač mdơ̆ng leh 1.046 boh sang, mâo 65,5%, anei jing boh tŭ prŏng mơ̆ng dŭm phŭn, dhar bruă, alŭ wăl. Knŏng adôk 2 čar Gia Lai leh anăn Dak Lak brei gĭr bi leh hlăm hruê 15/1. Khua knŭk kna lač dŭm boh sang bi leh brei mâo pui kmlă, êa yua, dang kông, mâo kdrăp mnơ̆ng kơ mnuih ƀuôn sang.