VOV4.Êđê - Aguah hruê 26/7, ti Anôk bruă knŭk kna, Khua knŭk kna Phạm Minh Chính gĭt gai Klei bi kƀĭn knŭk kna bruă čih mkra hdră bhiăn mlan 7/2022 čiăng ksiêm 4 klei čih mkra hdră bhiăn, 1 klei akâo čih mkra hdră bhiăn lehanăn 1 Hdră mtrŭn mơ̆ng Knŭk kna. Blŭ pŏk knăm anei, Khua knŭk kna lač klă, bruă bi leh klei bhiăn jing 1 hlăm 3 bruă phŭn. Khua knŭk kna mtă brei ksiêm klei dôk mâo čiăng thiăm mbŏ, bi leh, mkăp kơ hdră kriê dlăng jăk hĭn. Dŭm phŭn, dhar bruă, alŭ wăl mđĭ hĭn mnuih mă bruă kơ hdră anei kyua lu anôk ka mđing mĭn. Khua knŭk kna jao kơ Phŭn bruă kriê dlăng Hdră bhiăn ktrâo lač kơ klei anei; Phŭn bruă Ngăn prăk mđing kơ bruă anei. Klei bi kƀĭn mđing kơ 4 klei čih mkra hdră bhiăn, mâo Hdră bhiăn gang mkhư̆ sowil, Hdră bhiăn gang mkhư̆ klei mblư̆ prăk (mkra mlih), hdră bhiăn răng mgang klei tŭ dưi mnuih blei yua (mkra mlih), Hdră bhiăn mnia mblei hŏng elektronik, dôk čiăng êdi ară anei kñăm hluê ngă kjăp klei kiă kriê mơ̆ng knŭk kna ba wĭt klei tŭ dưn, mjing klei găl kơ mnuih ƀuôn sang hluê ngă hdră bhiăn jăk hĭn./.

H’ Nêč pô mblang