Blŭ ti knăm anei, Khua knŭk kna Phạm Minh Chính mñă, wăl anôk mnia mblei chứng khoán Việt Nam jing sa wăl anôk prŏng, yuôm bhăn mơ̆ng anôk bruă ngăn prăk lač hjăn lehanăn hdră duh mkra wăl anôk mđing truh kơ hdră êlan yang ƀuôn ngă phŭn ti ala čar drei lač kluôm, jing sa hdră duh bi liê jăk, jak iêu phŭn mkăp prăk duh bi liê wưng man dưn lehanăn sui thŭn kơ anôk bruă duh mkra, đru mguôp yuôm bhăn hlăm hdră mkŏ dăp anôk bruă duh mkra, mlih mrâo gru hmô đĭ kyar; mđĭ kyar bruă duh mkra – ala ƀuôn.

Kơ bruă klam, hdră msir hlăm wưng ti anăp, Khua knŭk kna mtă kơ Phŭn bruă ngăn prăk, Dhar bruă Chứng khoán knŭk kna bi hgŭm hŏng Knơ̆ng prăk knŭk kna, Phŭn bruă hdră kčah lehanăn duh bi liê mbĭt hŏng dŭm phŭn, dhar bruă djŏ tuôm mđing čih mkra lehanăn pŏk ngă dŭm hdră bruă klă klơ̆ng mơ̆ng Hdră êlan mđĭ kyar wăl anôk chứng khoán truh kơ thŭn 2030.