Aguah mbruê 20/4, Klei kƀĭn trông ba mdah leh anăn hluê ngă hdră čuăl mkă kluôm ala čar wưng thŭn 2021 – 2030, tă hdră truh ti thŭn 2050, hŏng akŏ “Klei mĭn mrâo – hdră tă mrâo – klei găl mrâo – boh tŭ dưn mrâo” dưi mkŏ mjing ti gŭ klei gĭt gai mơ̆ng Khua knŭk kna Phạm Minh Chính. Klei kƀĭn dưi mkŏ mjing êlan online mkŏ hŏng dŭm anôk bi kƀĭn knŭk kna leh anăn 63 čar, ƀuôn prŏng gưl dlông. Blŭ hlăm klei kƀĭn, Khua knŭk kna Phạm Minh Chính mñă klă, čuăl mkă kluôm ala čar jing bruă klam kđi čar yuôm bhăn mâo boh tŭ hdră êlan, tur knơ̆ng, wưng sui, ƀiădah ăt jing boh klei prŏng, mrâo, dleh dlan leh anăn ka tuôm mâo.

Anei jing tur knơ̆ng hdră bhiăn, mnơ̆ng yua yuôm bhăn đru kơ knŭk kna bi klă, mkŏ mjing boh kdrŭt, wăl đĭ kyar, rơ̆ng kơ klei mkŏ hrăm mbĭt plah wah čuăl mkă gưl ala čar hŏng čuăl mkă krĭng leh anăn čar, kñăm ba yua jih hnơ̆ng klei găl, ai dưi mơ̆ng ala čar čiăng mđĭ kyar bruă duh mkra ala ƀuôn hmar leh anăn kjăp. Khua knŭk kna mtă kơ dŭm gưl bruă, dhar bruă kñăm gĭt gai, ktrâo lač, hluê ngă hrăm mbĭt, tŭ dưn 10 bruă klam hdră êlan, mbha bruă klam klă klơ̆ng čiăng mđing tal êlâo kơ bruă dăp ai dưi hluê ngă tŭ dưn hdră êlan anei.