VOV4.Êđê- Tlam mbruê, ti anôk bruă knŭk kna, êpul gĭt gai klei êđăp ênang êlan mạng ala čar kƀĭn klei kƀĭn tal 1, ti gŭ klei gĭt gai mơ̆ng Khua knŭk kna Phạm Minh Chính, khua êpul gĭt gai. Blŭ hlăm klei kƀĭn, Khua knŭk kna Phạm Minh Chính brei thâo, kluôm ala dôk mtrŭt mđĭ klei mlih mrô, mkŏ mjing knŭk kna điện tử, mđing truh kơ knŭk kna mrô, yang ƀuôn mrô, bruă duh mkra mrô, mnuih ƀuôn sang mrô. Kyuanăn, srăng mđĭ hĭn klei ksiêm dlăng ala čar, bi kluôm ênŭm hdră kiă kriê, klei gĭt gai, ktrâo lač sa ai mơ̆ng gŭ truh kơ dlông, mđing truh kơ mnuih ƀuôn sang, knơ̆ng bruă nao hgŭm, mđĭ hĭn klei thâo kdrăp mrâo mrang, ngăn prăk, anak mnuih čiăng rơ̆ng klei êđăp ênang êlan mạng, kñăm bi klă hdră êlan, hdră mtrŭn mơ̆ng Đảng, răng mgang klei jăk kơ ala čar, djuê ana, klei jăk kơ mnuih ƀuôn sang, knơ̆ng bruă leh anăn grăp čô djŏ tuôm. Hlăm klei kƀĭn anei, phung hgŭm hlăm êpul gĭt gai kñăm bi trông, brei boh blŭ kơ boh sĭt klei êđăp ênang êlan mạng ala čar hlăm hruê mmông êgao leh anăn đăo knăl boh sĭt hlăm hruê mmông kơ anăp. Brei klei blŭ kơ boh tŭ klei ngă bruă thŭn 2021 leh anăn hdră tă klei ngă bruă thŭn 2022, đa đa boh klei kñăm, hdră êlan yuôm bhăn kơ klei êđăp ênang êlan mạng ala čar.

Pô mblang: Y-Ƀel Êban