VOV4.Êđê- Aguah mbruê 5/7, Khua knŭk kna Phạm Minh Chính gĭt gai klei kƀĭn tal 15 mơ̆ng êpul gĭt gai ala čar bruă gang mkhư̆ klei ruă tưp Covid-19. Blŭ hlăm klei kƀĭn, Khua knŭk kna Phạm Minh Chính mtă kơ phung bi ala kñăm bi trông, bi klă boh sĭt klei ruă tưp tar rŏng lăn, alŭ wăl leh anăn hlăm ala čar, dŭm ƀoh klei mrâo, klei dleh ksiêm dlăng mơ̆ng klei ruă tưp, dŭm boh tŭ dưi mâo, klei ka mâo, hlăk mblang phŭn agha, ba mdah dŭm mta kñăm, klei mĭn gĭt gai, hdră êlan lŏ dơ̆ng hlăm bruă bi mdrơ̆ng hŏng klei ruă tưp Covid-19 kơ anăp. Ară anei, hlăm ala čar ăt mâo anôk mâo mmông luč klei răng, ngă ngơi mang leh klei ruă tưp dưi ksiêm dlăng, boh nik jing klei tlŏ mgang vaccine dôk êmưt, ka mâo ôh msĕ hŏng hdră kčah, hlăm anăn bruă tlŏ mgang vaccine kơ hđeh mơ̆ng 5 truh kơ 11 thŭn leh anăn aruăt tal 3 kơ phung mơ̆ng 12 – 17 thŭn, khădah knŭk kna, Khua knŭk kna mâo nanao klei gĭt gai. Khua knŭk kna Phạm Minh Chính mñă klă, amâodưi ngă ngơi mang, luč klei răng, mâo hdră êlan hur har, čŏng pô. Hlăm anăn, boh sĭt brei ƀuh vaccine jing mnơ̆ng bi klă. Bruă tlŏ mgang vaccine jing boh tŭ, bruă klam mơ̆ng grăp čô čiăng răng mgang pô, gŏ sang pô leh anăn yang ƀuôn.

Pô mblang: Y-Ƀel Êban