VOV4.Êđê - Aguah mbruê 14/4, ti anôk bruă knŭk kna, Êpul gơ̆ng klei bi ktưn leh anăn pah mni gưl dlông wưng păn bruă thŭn 2021 -2026 mkŏ mjing leh klei kƀĭn gưl tal 2 ti gŭ klei gĭt gai mơ̆ng Khua knŭk kna Phạm Minh Chính, khua gĭt gai knơ̆ng. Leh hmư̆ dŭm klei blŭ bi trông, bi klă hlăm klei kƀĭn, Khua knŭk kna yap yuôm bhăn leh anăn pah mni ai tiê bruă klam mơ̆ng phung hgŭm hlăm êpul gơ̆ng, mâo leh dŭm mta bruă klă klơ̆ng, mâo boh tŭ dưn, mâo lu klei đru mguôp kơ klei bi ktưn leh anăn klei pah mni.

Bi kơ bruă klam, hdră êlan kñăm hlăm thŭn 2022, Khua knŭk kna lač klă: Mkŏ mjing, mtrŭt mjhar klei bi ktưn mâo boh tŭ dưn, mbĭt hŏng dŭm mta kñăm mđĭ kyar bruă duh mkra – ala ƀuôn bi êdah leh hlăm hdră mtrŭn klei kƀĭn kluôm bruă Đảng tal 13, hdră mtrŭn mơ̆ng bruă kƀĭn ala, knŭk kna, hdră mtrŭn klei kƀĭn bruă Đảng leh anăn hdră mtrŭn êpul gơ̆ng bruă ƀuôn sang dŭm gưl. Srăng lŏ dơ̆ng mlih mrâo klei bi ktưn nao mbĭt hŏng bruă klam kđi čar mơ̆ng phŭn, dhar bruă, alŭ wăl hluê si klei knŭk kna ba mdah hlăm thŭn 2022 jing “Bi mguôp hdră bhiăn, čŏng bi djŏ guôp êđăp ênang, mâo boh tŭ dưn, krŭ wĭt leh anăn đĭ kyar”.

Y-Ƀel pô mblang