VOV4.Êđê - Aguah mbruê, ti anôk bruă knŭk kna, Khua knŭk kna Phạm Minh Chính gĭt gai leh klei kƀĭn gưl tal 2 mơ̆ng Dhar bruă ala čar kơ klei mlih mrô. Klei kƀĭn dưi mkŏ mjing êlan online mkŏ hŏng 63 čar, ƀuôn prŏng hlăm kluôm ala. Blŭ hlăm klei kƀĭn, Khua knŭk kna Phạm Minh Chính mñă klă, bruă mlih mrô ala čar jing sa bruă klam yuôm bhăn, nao mbĭt hŏng tlâo kmeh gơ̆ng phŭn jing knŭk kna mrô, bruă duh mkra mrô leh anăn yang ƀuôn mrô. Đảng, knŭk kna, Khua knŭk kna mâo klei uêñ mĭn êdi kơ bruă mlih mrô, mđing truh kơ knŭk kna mrô, bruă duh mkra mrô, yang ƀuôn mrô, mnuih ƀuôn sang mrô. Khua knŭk kna mtă brei ksiêm wĭt hdră kiă kriê kyua anei jing 1 hlăm 3 klei kdlưn hĭn hlăm bruă bi klă hdră kiă kriê, bi mbŏ, bi kluôm ênŭm hdră kiă kriê mâo bruă mkŏ mkra mrâo mrang, boh nik jing klei hâo hưn mrâo mrang, mđĭ kyar klei mrâo mrang mrô, dưn yua kdrăp mrâo mrang mrô. Srăng dưi iêo mthưr ai dưi, mđĭ hĭn grăp klei bi mguôp, iêo mthưr klei đru mguôp mơ̆ng mnuih ƀuôn sang. Boh klei ti nei jing si srăng kriê dlăng čiăng mlih mrô hŏng klei mrâo mrang, djŏ guôp hŏng boh sĭt, bruă duh mkra, ai dưi, mbĭt anăn mđĭ hĭn hnơ̆ng tŭ jăk ai dưi mă bruă.

Y-Ƀel pô mblang