VOV4.Êđê - Aguah mbruê, Khua knŭk kna Phạm Minh Chính gĭt gai leh klei kƀĭn kluôm ala êlan online kơ bruă mtrŭt mđĭ klei brei čan duh bi liê bruă knŭk kna leh anăn hluê ngă 3 hdră ala čar kñăm, mâo: Mkŏ mkra krĭng ƀuôn sang mrâo, mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, bi hrŏ ƀun hŏng klei kjăp.

Khua knŭk kna mtă, phung bi ala kñăm bi trông leh anăn ba mdah dŭm hdră êlan, hdră tă kơ dŭm bruă klam mơ̆ng ară anei truh kơ jih thŭn 2022, rơ̆ng hluê ngă mâo boh tŭ dưn, mbruă, djŏ guôp hŏng boh sĭt čiăng ruh mgaih klei dleh dlan, kpăl êgun hlăm bruă brei čan duh bi liê bruă knŭk kna leh anăn hluê ngă 3 hdră ala čar kñăm. Phung bi ala kah mbha dŭm klei bi hmô, klei ngă bruă, hdră êlan hlăm bruă hluê ngă, khua gĭt gai ktrâo lač, bi klă leh anăn mă klei hriăm. Yap yuôm bhăn bruă klam mơ̆ng pô ba anăp čiăng mtrŭt mđĭ klei brei čan duh bi liê bruă knŭk kna leh anăn 3 hdră ala čar kñăm.

Y-Ƀel pô mblang