Hluê si hdră hlăm klei kƀĭn anei, knŭk kna ksiêm dlăng, brei klei blŭ kơ 4 mta phŭn čih mkra klei bhiăn: Klei mñă čih mkra klei bhiăn sang hră mơar, hdră mkăp klei bhiăn djă pioh (mkra mlih); mñă brei mkŏ mjing klei bhiăn mkra mlih, bi mbŏ dŭm mta hlăm klei bhiăn hóa chất; Kơ bruă mkŏ mjing hdră bhiăn mkra mlih, bi mbŏ dŭm mta hlăm klei bhiăn duh bi liê, ngăn prăk knŭk kna, klei dleh kpăk mơ̆ng dŭm hdră duh bi liê bruă knŭk kna.

Blŭ hlăm klei kƀĭn, Khua knŭk kna Phạm Minh Chính brei thâo, hluê ngă 1 hlăm 3 klei kdlưn hĭn, mơ̆ng thŭn 2022 truh kơ ară anei, knŭk kna rơ̆ng hlăm grăp mlan mâo sa gưl kƀĭn čih mkra klei bhiăn. Hlăm anăn kñăm ruh mgaih klei dleh dlan, kpăk gun djŏ tuôm hŏng hdră kiă kriê, mñă klă bruă klam mơ̆ng pô ba anăp leh anăn mkăp ai dưi mkŏ mjing klei kiă kriê, klei bhiăn ala čar. Klei kƀĭn tal 6, bruă kƀĭn ala gưl 15 ti mlan 10 kơ anăp knŭk kna srăng ba mdah hŏng bruă kƀĭn ala bi klă 9 hdră bhiăn, brei klei blŭ mguôp kơ 8 hdră bhiăn, hlăm anăn mâo lu klei bhiăn dleh, dôk mâo lu klei blŭ mdê mdê. Kyuanăn, Khua knŭk kna mtă bruă kñăm ai dưi čiăng mprăp jăk, rơ̆ng djŏ hruê, hnơ̆ng tŭ jăk bruă čih mkra hdră bhiăn, dŭm klei bhiăn, ruah mghaih klei dleh dlan, mkŏ mjing tur knơ̆ng ai dưi mrâo kơ klei đĭ kyar.