VOV4.Êđê- Aguah mbruê 24/8, ti anôk bruă knŭk kna, Khua knŭk kna Phạm Minh Chính gĭt gai klei kƀĭn knŭk kna kơ bruă mkŏ mjing klei bhiăn mlan 8/2022 čiăng ksiêm dlăng 4 hdră klei bhiăn yuôm bhăn êlâo kơ ba mdah hlăm klei kƀĭn gưl tal 4, bruă kƀĭn ala gưl 15 jing: Hdră klei bhăn lăn ala (mkra mlih) mơ̆ng Phŭn bruă ngăn dŏ leh anăn wăl hdĭp mda mprăp brei, klei bhiăn bi lông blei klei ngă bruă (mkra mlih) mơ̆ng phŭn bruă hdră êlan leh anăn duh bi liê mkăp brei, Hdră klei bhiăn Êpul bi mguôp (mkra mlih) mơ̆ng phŭn bruă hdră êlan leh anăn duh bi liê mkăp brei, klei bhiăn ênoh ênil (mkra mlih) mơ̆ng Phŭn bruă ngăn prăk mkăp brei.

Blŭ hlăm klei kƀĭn, Khua knŭk kna Phạm Minh Chính mñă klă, bruă mkŏ mjing hdră klei bhiăn jing yuôm bhăn sơnăk, jêñ jêñ, kyuanăn mtă kơ phung khua êmua hlăm knŭk kna, khua kiă kriê dŭm anôk nruă srăng hluê ngă jăk, knăm jih ai dưi, klei thâo, bi trông klă nik. Khua knŭk kna hmăng mhưi phung bi ala kñăm brei boh blŭ kơ dŭm boh klei mdê mdê, dŭm mta phŭn mrâo, dôk mâo klei dleh kpăk hŏng boh sĭt.

Pô mblang: Y-Ƀel Êban