Dŭm klei hưn hlăm klei kƀĭn brei thâo, hlăm 11 mlan thŭn anei, hnơ̆ng klei brei čan duh bi liê bruă knŭk kna kluôm lăn čar mâo hlăm brô 461 êbâo êklai prăk, mâo 65,1%, lu hĭn 6,77% mkă hŏng wưng anei thŭn dih leh anăn ênoh lu hĭn mkă hŏng wưng anei thŭn dih 122,6 êbâo êklai prăk. Khădah hnơ̆ng brei čan duh bi liê bruă knŭk kna kluôm lăn čar jăk hĭn mkă hŏng thŭn 2022, ƀiădah dôk 41 Phŭn bruă, anôk bruă gưl dlông kleh anăn 24 alŭ wăl mâo hnơ̆ng brei čan ƀiă hĭn mkă hŏng hnơ̆ng kah knar lăn čar.

Hlăm klei kƀĭn trông, khua gĭt gai knŭk kna leh anăn dŭm phŭn, dhar bruă, alŭ wăl hưn mdah, bruă brei čan duh bi liê bruă knŭk kna êmưt kyua dŭm phŭn agha msĕ si: dleh dlan hlăm klei čiu tla kơ bruă ruh mgaih anôk ala, klei ngă ră mơar dôk dleh dlan, đa đa klei čuăn hlăm hdră bhiăn dôk lăp wĭt lăp nao kơh dưi mkra mlih…Bi klă hlăm klei kƀĭn trông, Khua knŭk kna Phạm Minh Chính ƀuah ktang phĭt dŭm Phŭn bruă, anôk bruă, alŭ wăl mâo hnơ̆ng brei čan ƀiă, mtă kơ dŭm anôk bruă, alŭ wăl čiăng lŏ dơ̆ng ngă jăk, mă klei hriăm, hluê anăn srăng ktang phĭt hluê ngă dŭm hdră êlan čiăng bi hơĭt klei brei čan duh bi liê bruă knŭk kna ti anôk bruă, alŭ wăl pô hmar leh anăn tŭ dưn hĭn.