VOV4.Êđê -  Aguah mbruê, ti anôk bruă knŭk kna, Khua knŭk kna Phạm Minh Chính gĭt gai leh klei kƀĭn kơ klei mkăp brei pui kmlă leh anăn klei kơ hdăng, êwa čuh kơ bruă bi êran pui kmlă. Blŭ hlăm klei kƀĭn, Khua knŭk kna Phạm Minh Chính lač klă, pui kmlă jing 1 hlăm 5 mta bruă prŏng drei srăng rơ̆ng čiăng krŭ wĭt pral leh anăn mđĭ kyar bruă duh mkra ala ƀuôn. Hruê mmông êgao, mbĭt hŏng klei čiăng ba yua đĭ hluê si klei đĭ kyar bruă duh mkra – ala ƀuôn, leh hluê êlan hdĭp êđăp ênang hŏng klei ruă tưp Covid-19, krŭ wĭt leh anăn đĭ kyar bruă duh mkra ala ƀuôn, klei čiăng ba yua pui kmlă, klă klơ̆ng jing ti ala čar drei dôk đĭ ktang. Êngao kơ anăn, boh sĭt klei mkăp brei, ênoh pui kmlă tar rŏng lăn dôk mâo lu klei mlih. Hlăm klei kƀĭn, phŭng k’iăng Khua knŭk kna, phung bi ala dŭm phŭn, dhar bruă, anôk bruă mâo leh klei bi trông leh anăn ba mdah dŭm klei đăo knăl, ba mdah dŭm hdră êlan msir mgiah dŭm klei dleh dlan, klei lông dlăng, klei kčĕ bruă bi mguôp plah wah dŭm phŭn, dhar, anôk bruă kñăm rơ̆ng klei mkăp brei pui kmlă đru kơ klei đĭ kyar bruă duh mkra ala ƀuôn hlăm hruê mmông kơ anăp. Blŭ bi ruê̆ klei kƀĭn, Khua knŭk kna Phạm Minh Chính mñă klă, čiăng hluê ngă dŭm hdră êlan rơ̆ng klei bi knar kơ pui kmlă, klei kriê dlăng, bi mguôp, mkra mlih hŏng klei mbruă, mâo boh tŭ dưn, mta kñăm jing rơ̆ng klei mtăp mđơr pui kmlă hŏng klei kjăp.

Y-Ƀel pô mblang