VOV4.Êđê- Aguah mbruê 10/8, Khua knŭk kna Phạm Minh Chính, khua êpul gĭt gai mơ̆ng knŭk kna kơ dŭm bruă mkŏ mkra, hdră ala čar kñăm bruă êlan klông leh anăn dŭ mdiăng gĭt gai leh klei kƀĭn online mơ̆ng Êpul gĭt gai. Klei kƀĭn mkŏ klă anăp hŏng êlan online plah wah dŭm anôk bi kƀĭn anôk bruă knŭk kna hŏng anôk bi kƀĭn bruă sang čư êa 33 čar, ƀuôn prŏng gưl dlông mâo dŭm hdră mkăp, bruă mkŏ mkra kñăm. Hlăm klei kƀĭn tal 2 mơ̆ng êpul gĭt gai, Khua knŭk kna Phạm Minh Chính mnă klă, čiăng ktang phĭt hluê ngă 3 hdră kdlưn hĭn, hlăm anăn mâo klei kdlưn hĭn kơ bruă mkŏ mkra êlan klông, mâo knhuah hluh krĭng, hluh čar.

Ară anei, kơ bruă ngăn prăk dôk mâo leh dôk hluê ngă hur har kyua bi hrŏ leh ênoh hdră duh bi liê mơ̆ng knŭk kna truh tĭ gŭ 5.000 hdră mkăp, kñăm kơ dŭm hdră prŏng leh anăn dưi iêo mkrum ngăn prăk mơ̆ng gưl dlông, alŭ wăl, iêo mkrum mơ̆ng ênoh ngăn prăk wưng man dưn, ênoh prăk krŭ wĭt leh anăn mđĭ kyar bruă duh mkra ala ƀuôn, ênoh prăk mkiêt mkriêm. Khua knŭk kna brei thâo, čiăng mkŏ mjing ai dưi kluôm, srăng mkŏ mjing êpul gĭt gai mơ̆ng knŭk kna čiăng gĭt gai dŭm mta bruă anăn hluê si bruă ngă, bruă klam, klei dưi mơ̆ng knŭk kna, dŭm phŭn, dhar bruă, alŭ wăl čiăng bi djŏ hŏng dŭm mta bruă, čiăng ksiêm dlăng, mtrŭt mjhar, ba mdah dŭm hdră êlan mgaih msir klei dleh kpăk.

        Pô mblang: Y-Ƀel Êban