VOV4.Êđê-  Aguah mbruê, ti anôk bruă knŭk kna, Khua knŭk kna Phạm Minh Chính gĭt gai leh klei kƀĭn trông kluôm ala kơ boh sĭt klei đĭ kyar bruă duh mkra ala ƀuôn mlan 3 leh anăn tlâo mlan akŏ thŭn 2022, ba mdah hdră êlan krŭ wĭt leh anăn mđĭ kyar bruă duh mkra ala ƀuôn, boh sĭt leh anăn hdră êlan mtrŭt mđĭ klei mkăp brei, brei čan duh bi liê bruă knŭk kna hlăm thŭn 2022, bruă mkŏ mjing dŭm hdră mkŏ mkra êlan klông yuôm bhăn hlăm ala čar.

Blŭ hlăm klei kƀĭn trông, Khua knŭk kna Phạm Minh Chính mñă klă, hruê 5/1, knŭk kna mkŏ mjing klei kƀĭn êlan onlien mkŏ hŏng dŭm alŭ wăl kơ boh sĭt klei đĭ kyar bruă duh mkra ala ƀuôn thŭn 2022, truh kơ ară anei, bŏ 3 mlan leh klei kƀĭn trông anăn, čiăng mâo klei čih yap klei ngă bruă thŭn 2022, klei čŏng ngă bruă, klei hur har mơ̆ng mnuih ƀuôn sang, êpul êya dŭm knơ̆ng bruă ti gŭ klei gĭt gai mơ̆ng bruă sang čư êa dŭm gưl. Khua knŭk kna mtă, dŭm anôk bruă gưl dlông srăng hmao mâo hdră êlan, bi hrŏ jih hnơ̆ng dŭm klei hmăi amâo jăk, hŏng mta kñăm knhal tač jing rơ̆ng klei hơĭt bruă duh mkra prŏng hŏng dŭm klei bi knar prŏng, mkŏ mjing bruă duh mkra êngiê leh anăn čŏng pô.

Khua knŭk kna mtă kơ phung bi ala kñăm jih klei thâo, ksiêm wĭt dŭm klei hriăm mâo leh, ba mdah dŭm hdră êlan mơ̆ng ară anei truh kơ jih thŭn čiăng hluê ngă dŭm hdră mtrŭn mơ̆ng bruă kƀĭn ala, knŭk kna, bi klă boh tŭ mơ̆ng klei kƀĭn trông gưl dlông 4 mlan 10/2020.

Pô mblang: Y-Ƀel Êban