VOV4.Êđê- Aguah mbruê, ti anôk bruă knŭk kna, Khua knŭk kna Phạm Minh Chính gĭt gai leh klei kƀĭn online mơ̆ng knŭk kna hŏng dŭm alŭ wăl, hmư̆ klei hưn mdan boh tŭ klei ksiêm duah hŏng 5 hdră rŭ mkra êlan klông phŭn mâo: Êlan dar 4 krĭng ƀuôn prŏng Hà Nội, êlan dar ƀuôn prŏng Hồ Chí Minh, êlan dơ̆ng pral Châu Đốc – Cần Thơ – Sóc Trăng, êlan dơ̆ng pral Khánh Hoà – Ƀuôn Ama Thuôt, êlang dơ̆ng pral Biên Hòa – Vũng Tàu. Hlăm klei kƀĭn, Khua knŭk kna Phạm Minh Chính mñă klă, 5 hdră rŭ mkra anei jing dŭm bĭt êlan yuôm bhăn, jing êlan mkŏ dŭm anôk bruă duh mkra prŏng, êlang dơ̆ng phŭn mơ̆ng dŭm krĭng, čar, ƀuôn prŏng… Bruă mkŏ mjing 5 hdră rŭ mkra anei djŏ tuôm hŏng lu boh klei, lu čar, ƀuôn prŏng leh anăn lu mnuih ƀuôn sang. Kyuanăn Khua knŭk kna mtă kơ phung bi ala nao hgŭm hlăm klei kƀĭn čiăng kñăm ksiêm duah, ksiêm dlăng klă lu mta čiăng mâo boh tŭ dưn jăk.

Pô mblang: Y-Ƀel Êban