Blŭ hrăm hlăm klei bi kƀĭn, Khua Knŭk kna Phạm Minh Chính mnă ktang bruă klam mơ̆ng êlan êdeh treng leh anăn lač êlan êdeh treng srăng đru mgaih msir dŭm klei kpăk hlăm êlan klông. Khua Knŭk kna mñă ktang, Knŭk kna srăng mkăp ngăn prăk kơ êlan êdeh treng Lào Cai - Hà Nội - Hải Phòng  leh anăn êlan êdeh treng Dưr - Dhŭng, ngă klei mkiêt mkriêm bi liê 5% ngăn prăk Knŭk kna čiăng duh bi liê kơ 2 êlan êdeh treng anei, mñă kơ dŭm phŭn, dhar bruă alŭ wăl mjêč brei čan duh bi liê kơ hdră.

Hlăm wưng kơ anăp, Khua Knŭk kna mñă brei hluê ngă hdră čiăng rơ̆ng kơ hnơ̆ng jăk, hdră mnêč, hdră kčah, tŭ dưn. Dŭm anôk bruă lŏ dơ̆ng tiŏ nao jih hnơ̆ng ai dưi čiăng ngă dŭm hdră, čiăng mâo hdră êlan, klei đru djŏ guôp. Khua Knŭk kna jao kơ Bruă sang čư̆ êa dŭm čar, ƀuôn prŏng mâo êlan êdeh treng găn srăng gĭt gai, mtrŭt bi pral bruă ruh mgaih anôk ala, mbĕ mđuĕ bruă mkŏ mkra, mkŏ mjing dŭm anôk dôk mrâo kơ mnuih ƀuôn sang mbĕ đuĕ.