Ti knăm anei, dua Khua knŭk kna bi trông leh kluôm kơ hdră mđĭ kyar bruă duh mkra – ala ƀuôn grăp ala čar, hdră mkra mđĭ klei bi mjĕ dua nah; dŭm bruă hlăm krĭng lehanăn tar rŏng lăn dôk mđing. Khua knŭk kna Belanda bi êdah klei bi kngăr anăp boh tŭ Việt nam dưi mâo hlăm hdră krŭ wĭt, mđĭ kyar bruă duh mkra êdei kơ klei ruă Covid 19 lehanăn mơ̆ng leh gưl čhưn thŭn 2019 mơ̆ng Ñu.

Dua khua kiă kriê bi mni klei gĭr mơ̆ng dua tĭng hlăm bruă bi sĭt klei ƀuăn lehanăn klei kuôl kă hgŭm bruă mâo bi mklă. Dua khua knŭk kna tŭ ư mđĭ hĭn klei đăo knang hlăm bruă kđi čar hluê hdră bi tuôm gưl dlông, pŏk ngă tŭ dưn klei bhiăn hgŭm bruă dua nah, ksiêm dlăng čih mkra klei bhiăn mă bruă mrâo plah wah dua ala čar, mñă hdră duh mkra – mnia mblei jing bruă yuôm hlăm klei bi hgŭm dua nah’ tŭ ư pŏk ngă tŭ dưn, djăp ênŭm Klei kuôl kă bruă mnia mblei êngiê Việt Nam – EU (EVFTA). Dua khua kiă kriê tŭ ư lŏ mđĭ Klei bi hgŭm phŭn hlăm hdră mdrơ̆ng hŏng klei bi mlih yan adiê, kriê dlăng êa, bruă lŏ hma h’ĭt kjăp, đru mdrơ̆ng hŏng klei lông dlăng dôk mâo hlăm tar rŏng lăn. Leh hdră bi trông, dua khua kiă kriê nao dlăng Knăm jao 4 mta hră m’ar bi hgŭm bruă mơ̆ng dŭm Phŭn, dhar bruă, êpul hgŭm dua ala čar hlăm bruă tui duah lehanăn kuai mă mnơ̆ng hlăm gŭ lăn, hdră duh bi liê, mnia mblei./.