Leh knăm tŭ drông, dua čô khua gĭt gai ngă klei blŭ hrăm kơ klei bi mguôp 2 nah leh anăn ktuê dlăng knăm bi klă dŭm hdră mơar bi mguôp. Dua čô Khua knŭk kna mñă klă klei yuôm bhăn mơ̆ng bruă amâo mâo mdei rơ̆ng kơ klei bi mguôp, bi đru hdơ̆ng pô hlăm klei bi blah sua wĭt klei êngiê djuê ana, mdlưh klei kiă kriê mtuč djuê ana Pol Pot êlâo dih ăt msĕ hŏng bruă mkŏ mjing, mđĭ kyar lăn čar ară anei.

Hluê si hdră hriê čuă Việt Nam, Khua knŭk kna Campuchia srăng mâo dŭm klei blŭ hrăm, bi tuôm hŏng khua gĭt gai gưl dlông mơ̆ng Đảng, knŭk kna Việt Nam čiăng ksiêm wĭt klei bi mguôp leh anăn bi trông čiăng mtrŭt mđĭ klei bi mguôp Việt Nam – Campuchia hlăm wưng kơ anăp ƀrư̆ hruê ƀrư̆ kluôm êlam, klă klơ̆ng, tŭ dưn.