­Khua knŭk kna Phạm Minh Chính gĭt gai hlăm hruê 11/4 mkŏ mjing sa êpul blŭ hrăm mơ̆ng Khua phŭn bruă tuh tia jing khua êpul, hŏng êpul ngă bruă thơ̆ng, mkŏ mjing hdră êlan bi mdrơ̆ng hluê si ai tiê bi kna boh tŭ, klei jhat đru bi gui. Khua knŭk kna bi myuôm bruă ngă pral, djŏ mmông mơ̆ng dŭm phŭn, dhar bruă hlăm wưng êgao. Ñu brei thâo, leh Japon hŏng Dhŭng Korea, Mi tŭ ư̆ blŭ hrăm hŏng Việt Nam čiăng bi kna klei mnia mblei hơĭt kjăp leh anăn sui.

Bi kơ hdră tă, Khua knŭk kna mñă ktang mta kñăm bi hơĭt anôk mnia mblei hlăm lăn čar, rơ̆ng klei êđăp ênang – bruă kđi čar – klei êđăp ênang yang ƀuôn, bi hơĭt ai tiê mnuih ƀuôn sang leh anăn pô duh bi liê, mbĭt anăn lŏ dơ̆ng rơ̆ng bi hơĭt bruă duh mkra, đĭ kyar, ksiêm dlăng klei prăk luč ênoh leh anăn bi kna ngăn prăk. Khua knŭk kna lač anei jing mmông găl čiăng mkŏ wĭt bruă duh mkra hluê êlan mtah, dar, mlih mrâo hŏng klei mbruă, bi lu jơr anôk mnia mblei leh anăn klei mkăp brei. Khua knŭk kna ăt mñă brei bi pral brei čan duh bi liê bruă knŭk kna, bi hrŏ prăk jia, prăk tăk leh anăn mprăp ênoh 500.000 êklai prăk čiăng mtrŭt mđĭ klei blei ba yua, đru kơ knơ̆ng bruă.