VOV4.Êđê - Tlam bruê 26/1, Khua knŭk kna Phạm Minh Chính mâo leh klei nao čuă, hơêč hmưi tết kơ phung knuă druh, lĭng kahan ti kđông kahan ƀăng jang knông lăn Móng cái. Bi ala kơ Đảng, knŭk kna, Khua knŭk kna mơĭt kơ jih jang phung knuă druh, lĭng kahan ti kđông kahan ƀăng jang knông lăn Móng cái, êpul êya ngă bruă ti kđông kahan klei čuă êmuh leh anăn klei hơêč hmưi jăk siam hĭn. Khua knŭk kna mñă klă, Quảng Ninh jing alŭ wăl mâo klei yuôm bhăn hlăm bruă klei êđăp ênang, bruă lĭng kahan, jing anôk bi mguôp hŏng tač êngao mơ̆ng ala čar. Kyuanăn, êpul êya lĭng kahan knông lăn mâo bruă klam yuôm bhăn, đru mguôp răng mgang klei dưi kiă kriê ala čar, mkŏ mjing klei găl mđĭ kyar bruă duh mkra ala ƀuôn. Bi kơ bruă klam thŭn 2022, êpul êya lĭng kahan knông lăn čiăng thâo săng klă hĭn kơ bruă kñăm răng mgang klei kiă kriê mơ̆ng ala čar, leh anăn knông lăn ala čar, rơ̆ng kjăp klei êđăp ênang, hơĭt kjăp hlăm alŭ wăl knông lăn, mtrŭt mđĭ klei bi mguôp hŏng ala čar riêng gah. Ngă jăk bruă hŏng tač êngao, đru mkŏ mjing knông lăn êđăp ênang, bi mguôp leh anăn đĭ kyar.

Y-Ƀel pô mblang