VOV4.Êđê - Ƀri wưng knăm knhuah gru Bun Ti May ti ala čar Lào leh anăn knăm Chôl Chnăm Thmây ti ala čar Campuchia, Khua knŭk kna Phạm Minh Chính mâo leh klei blŭ êlan đĭng blŭ hơêč hmưi hŏng Khua knŭk kna ala čar Lào Phankham Viphavanh leh anăn Khua knŭk kna ala mta Campuchia Hun Sen.

Hlăm klei blŭ hŏng Khua knŭk kna Lào Phankham Viphavanh, Khua knŭk kna Phạm Minh Chính mâo klei hơêč hmưi kơ dŭm boh tŭ yuôm bhăn mơ̆ng knŭk kna leh anăn mnuih ƀuôn sang Lào dưi mâo leh hlăm bruă hluê ngă hdră mtrŭn klei kƀĭn prŏng mơ̆ng Đảng mnuih ƀuôn sang krŭ kdơ̆ng Lào leh anăn hdră êlan mđĭ kyar bruă duh mkra ala ƀuôn 5 thŭn gưl tal 9, bi êdah klei đăo knang ti gŭ klei gĭt gai mơ̆ng Đảng mnuih ƀuôn sang cách mạng Lào, mnuih ƀuôn sang Lào srăng lŏ mâo dŭm boh tŭ prŏng hĭn. Hlăm klei blŭ hŏng Khua knŭk kna Campuchia Hun Sen, Khua knŭk kna Phạm Minh Chính bi êdah klei đăo knang, ti gŭ klei gĭt gai mơ̆ng Khua knŭk kna Hun Sen, ala mtao Campuchia srăng đĭ kyar, mdrŏng sah hĭn, mkŏ mjing tŭ jing dŭm hdră bruă hlăm ala čar, bruă hŏng tač êngao yuôm bhăn hlăm thŭn 2022, hlăm anăn mâo klei ruah khua êpul hgŭm să, ƀuôn hgŭm leh anăn ngă jăk bruă klam jing khua gĭt gai ASEAN thŭn 2022.

Y-Ƀel pô mblang