Tlam mmăt mbruê 24/11, ti ƀuôn Dhar kreh - hiu čhưn ênguê dŭm djuê ana Việt Nam, Khua Knŭk kna Phạm Minh Chính nao hlăm knăm pŏk hruê kăm “Bi hgŭm mguôp dŭm djuê ana - Mnơ̆ng kriê pioh dhar kreh Việt Nam ” thŭn 2025 hŏng akŏ “Bi mguôp sa ai - mđing truh kơ kwar Krah” leh anăn iêo mthưr êpul êya knơ̆ng bruă, mnuih ƀuôn sang hrăm mbĭt đru kơ mnuih ƀuôn sang kwar krah - Lăn Dap Kngư mgaih msir boh jhat mơ̆ng klei êa lêč ngă truh. Hdră pŏk hŏng klei čih hưn kơ dŭm klei hmăi kjham mơ̆ng êa lêč ngă. Khua Knŭk kna iêo mthưr dŭm êpul bruă đru bi gui klei dleh dlan, đăo knang kơ ai ktang klei bi mguôp djuê ana srăng đru kơ lăn čar găn jih klei lông dlăng, lŏ dơ̆ng đĭ kyar hơĭt kjăp. Hlăm knăm, dŭm êpul êya, knơ̆ng bruă bi mkrum mguôp 540 êklai prăk đru kơ mnuih ƀuôn sang hmăi mơ̆ng êa lêč.

Tlam 24/11, ti Anôk bruă Knŭk kna,  Khua knŭk kna Phạm Minh Chính hŏng phung khua gĭt gai leh anăn êpul Adŭ bruă Knŭk kna đru kơ mnuih ƀuôn sang kwar Krah luč liê kyua angĭn êbŭ hŏng ai tiê “bi khăp, bi đru”, grăp čô knuă druh, phung mă bruă knŭk kna đru mguôp ƀiă êdi sa hruê mă bruă. Khua knŭk kna mtă kơ dŭm anôk bruă djŏ tuôm mjêč bi leh hră čih Hdră mtrŭn kơ bruă klam leh anăn msir mgaih klei yan adiê ngă, pral hơĭt klei hdĭp mda mnuih ƀuôn sang leh anăn kơrŭ wĭt bruă mkra mjing mnia blei. Mbĭt hŏng anăn, Khua knŭk kna gĭt gai mđĭ dŭm hdră msir kơ bruă duh mkra hŏng klei ksiêm dlăng prăk luč ênoh hlăm dŭm mlan adôk hlăm thŭn, rơ̆ng êđăp ênang kơ klei hdĭp mda ala ƀuôn leh anăn krơ̆ng kjăp kơ klei êđăp ênang kluôm.