VOV4.Êđê - Aguah mbrue (13/9), Khua knŭk kna Phạm Minh Chính kiă kriê leh klei bi kƀĭn tal 17 mơ̆ng Dhar bruă kiă kriê bruă mdrơ̆ng hŏng klei ruă tưp Covid 19. Klei bi kƀĭn anei dưi mkŏ mjing hlue hdră online mkŏ knŭk kna hŏng 63 boh čar lehanăn ƀuôn prŏng hlăm gưl dlông.

Blŭ hrăm ti anôk bi kƀĭn. Khua knŭk kna Phạm Minh Chính brei thâo: Truh kơ ară anei, drei ăt krơ̆ng kjăp klei duh mkra kluôm, dưi gang mkhư̆ klei prăk luič ênoh, lŏ kơrŭ wĭt bruă duh mkra lehanăn mâo klei đĭ kyar, klei hdĭp mda phung ƀuôn sang mâo klei bi mlih. Dŭm boh tŭ dưn anăn, dưi mâo kyua klei kiă kriê kjăp, lehanăn djŏ pral mơ̆ng Êpul khua kiă kriê Đảng gưl dlông, boh nik Phŭn bruă kđi čar, Êpul khua kiă kriê, klei bi sa ai, klei bi mguôp kjăp hlăm bruă kƀĭn ala, lehanăn jih jang bruă kđi čar... Drei dưi ngă leh jăk hdră êlan klei kơ vaccine. Siămdah, ară anei adôk mâo lu klei mĭn amâo mâo uêñ ôh hŏng klei ruă tưp, mơ̆ng anăn mơh bruă tlŏ vaccine gang mkhư̆ klei ruă tưp ka djăp ôh hŏng ênoh kčah čuăn mơ̆ng êpul khua kiă kriê. Anei jing bruă brei mâo klei hlak mblang bi nik. Khua knŭk kna mtă, mghaih msir bi pral klei kƀah êa drao, kdrăp mdrao mgŭn, rơ̆ng bi mâo djăp nai aê mdrao mgŭn, mđĭ hĭn bruă hâo hưn, mđĭ klei thâo săng hlăm phung ƀuôn sang kơ bruă mdrơ̆ng hŏng klei ruă tưp./.

Y-Khem pô mblang