VOV4.Êđê -  Aguah mbrue (4/7), ti gŭ klei kiă kriê mơ̆ng khua knŭk Phạm Minh Chính, pŏk leh klei bi kƀĭn online bruă knŭk kna hŏng dŭm alŭ wăl lehanăn klei bi kƀĭn kơ tuôr mlan 6 lehanăn 6 mlan akŏ thŭn 2022 kơ klei duh mkra ala ƀuôn. Blŭ hrăm ti anôk bi kƀĭn Khua knŭk kna lač, klei duh mkra ala ƀuôn mlan 6 lehanăn 6 mlan akŏ thŭn mâo klei bi mlih jăk hlăm djăp mta bruă.

Klei duh mkra kluôm jing hơĭt, prăk luič ênoh dưi ksiêm dlăng, khădah tuôm hŏng lu klei ktrŏ, boh nik ênoh čhĭ êa săng, êa pui đĭ, mâo klei tĭng bi kna hnơ̆ng hrui wĭt kơ knŭk kna, klei bi mnia mblei hŏng tač êngao, klei ngă bruă knuă, bruă pui kmlă lehanăn klei kơ mnơ̆ng ƀơ̆ng huă. Khua knŭk kna mñă, jih jang boh tŭ dưn leh mâo, jing klei gĭr lehanăn klei kiă kriê kjăp mơ̆ng Êpul khua kiă kriê bruă Đảng gưl dlông, mơ̆ng phŭn bruă kđi čar, boh nik khua gĭt gai Đảng Nguyễn Phú Trọng, mbĭt hŏng dŭm hdră êlan yuôm bhăn mơ̆ng knŭk kna, hlăm anăn mâo dŭm hdră mtrŭn mơ̆ng bruă kƀĭn ala, mâo klei kiă kriê, gĭt gai kjăp mơ̆ng knŭk kna, khua knŭk kna, lehanăn jih jang bruă kđi čar, mđrăm mbĭt hŏng phung duh mkra, lehanăn klei sa ai mơ̆ng phung ƀuôn sang, wăt klei bi đru mơ̆ng dŭm ala čar dlông rŏng lăn./.

Y-Khem pô mblang