VOV4.Êđê - Aguah mbrue (14/2), Êpul kiă kriê bruă gưl dlông ksiêm wĭt hdră mtrŭn mrô 19-NQ/TW mơ̆ng klei bi kƀĭn tal 6, Dhar bruă gĭt gai gưl dlông Đảng 11 kơ bruă lŏ dơ̆ng mlih mrâo hdră êlan, hdră bhiăn klei kơ lăn ala hlăm bruă mđĭ mlih kluôm dhuôm. Khua knŭk kna Phạm Minh Chính, jing khua Dhar bruă gĭt gai Gưl dlông ksiêm wĭt hdră mtrŭn mrô 19-NQ/TW kiă kriê klei bi kƀĭn.

Leh hmư̆ jih jang klei trông čhai, Khua knŭk kna mñă kơ dŭm mlih mrâo hdră bhiăn lăn ala, bi djŏ hŏng jih jang hdră bhiăn mkăn, bi djŏ hŏng klei bhiăn bruă kđĭ čar Việt Nam. Kơ bruă ti anăp, Khua knŭk kna mtă kơ dhar bruă kiă kriê gưl dlông gĭt gai klei čih mkra, lehanăn dŭm dhar bruă djŏ tuôm bi pral hrui kƀĭn jih jang klei blŭ mơ̆ng phung bi ala, phung khua prŏng, dŭm phŭn dhar bruă gưl dlông lehanăn alŭ wăl, phung truăn kơ bruă, phung kreh knhâo, hrŏng ruah, bi tŭ ư čiăng bi leh jih jang klei hâo mdah, čih mkra ba mdah kơ gưl mâo klei dưi hlăm wưng pral hĭn rơ̆ng djŏ hŏng hdră lehanăn kjăp./.

Y-Khem pô mblang