Hlăm mmông bi tuôm hŏng phung čih klei  mrâo, Khua knŭk kna Phạm Minh Chính brei thâo, 2 čô khua gĭt gai mrâo mâo mmông blŭ hrăm klă sĭt, đăo knang, hrăm mbĭt bi trông kơ lu boh klei bi mguôp hlăm lu mta bruă hlăm bruă 2 tĭng leh anăn lu tĭng.

Khua knŭk kna Luxembourg Xavier Bettel brei thâo, Luxembourg hrăm mbĭt nanao hŏng Việt Nam wăt kơ mmông dleh dlan leh anăn mmông găl, hmăng hmưi leh anăn đăo knang leh dŭm gưl nao čuă klei mjĕ giăm 2 ala čar srăng dưi mđĭ ti hnơ̆ng mrâo, nao klă klơ̆ng leh anăn êlam hĭn, tŭ dưn hĭn. Khua knŭk kna Xavier Bettel brei thâo, 2 tĭng tŭ ư mđĭ hĭn klei bi mguôp hlăm bruă mgaih msir boh klei tar rŏng lăn, hlăm anăn kñăm kơ bruă bi mdrơ̆ng leh anăn djŏ guôp hŏng klei mlih yan adiê. Ti tlam mbruê 4/5, 2 čô Khua knŭk kna nao čuă dlăng leh Văn Miếu – Quốc Tử Giám leh anăn sang rang mdah rup kač Việt Nam.