Anei jing gưl tal êlâo Khua knŭk kna Việt Nam mâo gưl nao čuă klă klơ̆ng truh kơ Turki, hŏng klei hmăng hmưi bi kjăp klei đăo knang bruă kđi čar leh anăn mkŏ mjing boh kdrŭt mrâo, mâo knhuah kdlưn hĭn kơ klei bi mguôp Việt Nam – Turki hlăm djăp mta bruă mơ̆ng bruă duh mkra, mnia mblei, duh bi liê truh kơ dŭm mta bruă bi mguôp mrâo msĕ si mlih mrâo hŏng klei mbruă, kreh knhâo, mrâo mrang, pui kmlă.

Hlăm êbeh sa hruê ti Turki, Khua knŭk kna Việt Nam srăng mâo giăm 20 mta bruă, êngao kơ klei bi tuôm hŏng khua gĭt gai Turki jing klei bi tuôm, nao hgŭm hlăm klei kƀĭn anôk bruă duh mkra kñăm mtrŭt mđĭ klei bi mguôp duh bi liê. Aguah mbruê, hluê mmông alŭ wăl, Khua knŭk kna Phạm Minh Chính drông leh Khua phŭn bruă mnia mblei Turki. Knăm tŭ drông klă klơ̆ng Khua knŭk kna Phạm Minh Chính mkŏ mjing ti 10 mmông aguah hlăm hruê. Hruê anei 30/11, Khua knŭk kna Phạm Minh Chính mâo hdră bi tuôm leh anăn mă bruă hŏng lu phung khua gĭt gai êpul grŭp prŏng mơ̆ng Turki.