Ti knăm anei, Khua knŭk kna bi mklă, Việt Nam ƀuăn srăng hrăm mbĭt lehanăn mjing djăp klei găl hluê djŏ hdră bhiăn čiăng kơ anôk bruă duh mkra Philippines duh bi liê tŭ dưn, h’ĭt kjăp, sui thŭn ti Việt Nam.

Khua knŭk kna mtă kơ dua tĭng brei mkŏ mjing lu hĭn hdră bi tuôm, mjĕ mjuk čiăng mtrŭt mđĭ hdră bi hgŭm dua bruă duh mkra, hluê ngă bi sĭt dŭm klei kuôl kă bi trông gưl dlông, ba klei bi mjĕ ƀĭng hgŭm phŭn Việt Nam - Philippines mŭt êlam hĭn, klă sĭt, tŭ dưn hĭn kyua mta kñăm đĭ kyar kjăp ktang mơ̆ng grăp ala čar, kyua klei hdĭp jăk yâo, trei mđao mơ̆ng mnuih ƀuôn sang dua ala čar, kyua klei êđăp ênang, h’ĭt kjăp, hgŭm bruă lehanăn đĭ kyar hlăm krĭng lehanăn tar rŏng lăn./.