VOV4.Êđê - Tlam mbruê, Khua knŭk kna Phạm Minh Chính mâo leh klei mă bruă hŏng êpul khua bruă Đảng čar Thái Bình. Hlăm mmông mă bruă, Khua knŭk kna Phạm Minh Chính čih yap leh anăn yap yuôm bhăn bruă hluê ngă hdră mtrŭn mơ̆ng klei kƀĭn kluôm bruă Đảng tal 13 mơ̆ng bruă Đảng čar, lĭng kahan leh anăn mnuih ƀuôn sang čar Thái Bình. Čar bi klă leh hdră mtrŭn hlăm klei kƀĭn bruă Đảng čar tal 20, ba mdah dŭm hdră mtrŭn mơ̆ng gưl dlông, bruă kƀĭn ala, knŭk kna.

Hruê mmông kơ anăp, Khua knŭk kna Phạm Minh Chính hmăng hmưi čar Thái Bình mâo bruă ngă kdlưn hĭn, kluôm ênŭm, kjăp hĭn, ênoh prăk ba wĭt kah knar grăp čô srăng lu hĭn. Čiăng mâo sơnăn, mâo klei thâo săng klă jing mta kñăm jing krĭng dap mnai krông Hồng, mâo lu klei găl, ai dưi anak mnuih, knhuah gru hƀuê ênuk… čiăng dưi ba yua jih hnơ̆ng. čiăng hluê ngă hdră mtrŭn hlăm klei kƀĭn kluôm bruă Đảng tal 13 djŏ guôp hŏng boh sĭt ti čar, mkŏ mjing hluê ngă jăk dŭm hdră mtrŭn mơ̆ng bruă kƀĭn ala, knŭk kna čiăng mđĭ kyar čar hlăm wưng mrâo.

Y-Ƀel pô mblang