Khua knŭk kna bi mni kơ klei gĭr phung Khua gĭt gai, gưl bruă Đảng, bruă sang čư̆ êa, lĭng kahan leh anăn mnuih ƀuôn sang čar Bình Dương leh anăn boh tŭ yuôm bhăn mâo leh, đru mguôp yuôm bhăn hlăm boh tŭ mbĭt kluôm ala. Kơ bruă klam, hdră msir phŭn, Khua knŭk kna mtă kơ čar Bình Dương brei mđĭ kyar êdah kdlưn hlăm dŭm mta bruă.

Mjêč mkŏ mjing, bi leh Hdră kčah hlue ngă Hdră kčah; bi mklă boh phŭn yuôm bhăn, hnơ̆ng leh anăn klei găl hlue ngă hdră bruă hlăm Hdră kčah boh nik dŭm hdră bruă phŭn. Mđĭ ktang brei čan prăk prăk bi liê knŭk kna, boh nik dŭm hdră bruă phŭn, lŏ dơ̆ng mđĭ lar gru hmô bi hgŭm knŭk kna-êngao knŭk kna, iêô jak prăk bi liê ala tač êngao. Khua knŭk kna mtă kơ čar Bình Dương, ba anăp hlăm hdră êlan sang dôk ala ƀuôn mjing klei găl kơ mnuih mă bruă blei, mưn sang dôk; Pŏk ngă tŭ dưn bruă đru kơ klei hdĭp mda ala ƀuôn, rơ̆ng klei tŭ dưn ala ƀuôn.