VOV4.Êđê -  Tlam hruê 10/7, Khua knŭk kna Phạm Minh Chính mă leh bruă hŏng Anôk kiă kriê bruă Đảng ƀuôn prŏng Cần Thơ kơ bruă pŏk ngă Hdră mtrŭn mơ̆ng Phŭn bruă kđi čar hlăm hdră mkŏ mkra lehanăn mđĭ kyar ƀuôn prŏng Cần Thơ truh ti thŭn 2030, hnơ̆ng trah dlăng truh thŭn 2045; Hdră mtrŭn mơ̆ng Anôk bruă kƀĭn ala kơ dŭm klei bhiăn, hdră mtrŭn mđĭ kyar ƀuôn prŏng Cần Thơ.

Blŭ ti knăm anei, Khua knŭk kna Phạm Minh Chính lač klă, khădah mâo lu klei tŭ yuôm bhăn, ƀiădah Cần Thơ ăt dôk lu klei êdu kƀah msĕ si: Ka mâo klei gĭr lu hlăm hdră kiă kriê kyua anăn ka dưi mâo boh kdrŭt kdlưn hĭn, brei mâo hdră duh bi liê kơ dŭm bruă phŭn, Mđĭ kyar bruă duh mkra ka năng hŏng klei găl mâo. Khua knŭk kna mtă, phung khua kiă kriê ƀuôn prŏng brei gĭt gai dŭm anôk bruă, dŭm gưl bruă sang čư̆ êa lŏ dơ̆ng hlak mblang, bi mklă mta phŭn lehanăn mă klei hriăm hlăm hdră kiă kriê čiăng lŏ ngă jăk hĭn hlăm wưng ti anăp./.

H’Nêč pô mblang