VOV4.Êđê - Tlam hruê 22/3, ti anôk bruă knŭk kna, Khua knŭk kna Phạm Minh Chính mă bruă hŏng Anôk kiă kriê Êpul hgŭm mnuih khua thŭn Việt Nam gưl dlông. Hưn mdah ti anôk bi kƀĭn, Khua kiă kriê Êpul hgŭm mnuih khua thŭn Việt Nam Nguyễn Thanh Bình brei thâo, Êpul anei ƀrư̆ hruê ƀrư̆ đĭ kyar, kjăp hlăm bruă mkŏ mjing, jak iêu lu mnuih khua thŭn nao hgŭm. Truh kơ ară anei, Êpul mâo êbeh 9,7 êklăk čô hgŭm, truh giăm 90% ênoh mnuih khua thŭn kluôm ala. Blŭ klah čŭn ti knăm anei, Khua knŭk kna Phạm Minh Chính m’ĭt leh asăp h’êč hmưi jăk siam truh kơ mnuih khua thŭn kluôm ala mbĭt anăn mñă klă, bruă anei bi êdah klei đua klam mơ̆ng knŭk kna hŏng mnuih khua thŭn, msiê mghaih dŭm klei bhiăn, hdră mtrŭn hŏng mnuih khua thŭn. Khua knŭk kna mtă brei mđing hĭn kơ hdră mtô mblang, mđĭ klei thâo kơ bruă đua klam, k’hưm, klei yuôm bhăn mơ̆ng hdră bruă. Mđĭ hnơ̆ng tŭ dưn bruă kriê dlăng knŭk kna hŏng hdră mă bruă mơ̆ng Êpul lehanăn đru răng mgang, kriê dlăng mnuih khua thŭn./.

H’Nêč pô mblang