VOV4.Êđê- Tlam hruê 29/5, Khua knŭk kna Phạm Minh Chính lehanăn Êpul mă bruă mơ̆ng Knŭk kna mă leh bruă hŏng Anôk kiă kriê bruă Đảng čar Sơn La kơ boh tŭ mđĭ kyar bruă duh mkra – ala ƀuôn, rơ̆ng klei êđăp ênang ala ƀuôn, mkŏ mkra bruă kđi čar h’ĭt kjăp hlăm thŭn 2021 lehanăn dŭm mlan akŏ thŭn 2022, hdră êlan, bruă klam hlăm wưng ti anăp. Blŭ ti knăm anei, Khua knŭk kna Phạm Minh Chính bi mni dŭm boh tŭ mâo bruă Đảng, bruă sang čư̆ êa lehanăn mnuih ƀuôn sang Sơn La dưi mâo hlăm hdră hluê ngă bruă klam mđĭ kyar hdră duh mkra – ala ƀuôn wưng êgao, đru mguôp hlăm hdră đĭ kyar mơ̆ng lăn čar.

Kơ klei mĭn gĭt gai hlăm wưng ti anăp, Khua knŭk kna Phạm Minh Chính mtă brei ksiêk kjăp, hluê ngă kjăp, tŭ dưn Hdră mtrŭn Klei bi kƀĭn tal XIII mơ̆ng Đảng, hdră mtrŭn Klei bi kƀĭn bruă Đảng čar, mơ̆ng gưl dlông, hlăm anăn mâo hdră mtrŭn djŏ tuôm kơ bruă lăn ala, bruă lŏ hma, ƀĭng ngă lŏ hma, krĭng ƀuôn sang lehanăn hdră duh mkra êpul êya, Hdră mtrŭn mơ̆ng Phŭn bruă kđi čar kơ hdră êlan mđĭ kyar bruă duh mkra – ala ƀuôn, rơ̆ng klei êđăp ênang krĭng čư̆ čhiăng kwar Dưr./.

                                                    Pô mblang: H’Nêč Êñuôl