Hlăm klei bi tuôm, phung bi ala bi mni hlăm dua mlan akŏ thŭn 2026, Điện Biên mâo dŭm boh tŭ dưn jăk, lu bruă mâo klei bi mlih, mjing tur knơ̆ng kơ klei kñăm đĭ kyar mơ̆ng jih thŭn. Klah čŭn mmông mă bruă, Khua knŭk kna mtă kơ čar pŏk ngă bi jih ai tiê, hriăm mbĭt dŭm hdră msir, gĭr mâo hnơ̆ng đĭ kyar bruă duh mkra mơ̆ng 11% kơ dlông hlăm thŭn 2026. Hlăm anăn, alŭ wăl brei kƀĭn pŏk ngă tŭ dưn dŭm sang mkra mjing pui kmlă, mđĭ kyar bruă tuh tia mkra mjing, êa pui êwa čuh; mbĭt anăn mđĭ ktang bruă lŏ mkra mjing lŏ hma hlue si hdră mkra mjing mnơ̆ng dhơ̆ng, mkŏ mjing klei bhiăn, hdră êlan đru kơ phung ngă lŏ hma bi mlih ana pla mjing, mđĭ kyar ana măk ka, kphê leh anăn dŭm mta mnơ̆ng dhơ̆ng phŭn.

 Ăt hlăm mmăt mbruê, nao hlăm Knăm mơak mnga Ban hŏng akŏ “Mnga Ban - Klei čang hmăng Điện Biên”, Khua knŭk kna bi êdah klei čang hmăng alŭ wăl lŏ dơ̆ng mđĭ lar ai tiê bi hgŭm, kriê pioh leh anăn lar bra knhuah dhar kreh, mjing klei găl čư̆ dliê êa jing boh kdrŭt mđĭ kyar kjăp kơ krĭng Yŭ Dưr.