VOV4.Êđê- Tlam mbruê 25/7, Khua knŭk kna Phạm Minh Chính mâo leh klei nao čuă, mă bruă hŏng dŭm anôk bruă bi klă ADN klang phung lĭng kahan djiê êngiă dôk kƀah klei čih pioh mâo anôk bruă mdrao mgŭn lĭng kahan, phŭn bruă kahan ksiêm, anôk bruă mdrao mgŭn ala čar, phŭn bruă mdrao mgŭn leh anăn anôk bruă klei mrâo mrang sinh học, anôk bruă ksiêm klei kreh knhâo leh anăn mrâo mrang Việt Nam. Hlăm mmông mă bruă, Khua knŭk kna Phạm Minh Chính mâo klei yăl dliê mgei ai tiê kơ klei mơak mnai mơ̆ng sa čô amĭ Việt Nam jhŏng ktang ti Nghệ An leh dưi ƀuh klang sa čô anak djiê êngiă 51 thŭn êlâo, ăt msĕ hŏng klei čang guôn mơ̆ng sa čô amĭ êlâo kơ djiê êjai dôk sa čô anak djiê êngiă ka dưi ƀuh klang ôh.  Klei bi blah kbưi leh ƀiădah dŭm klei ênguôt hning ăt dôk nanao, boh nik hŏng gŏ sang phung djiê êngiă, dŭm êtuh êbâo čô lĭng kahan djiê êngiă ka dưi bi klă ôh hlei pô anăn jing klei ênguôt hnĭng, klei amâo mâo jăk hlăm ai tiê kơ phung dôk hdĭp.

 Khua knŭk kna mnă klă, Đảng, knŭk kna leh anăn mnuih ƀuôn sang Việt Nam mâo nanao klei uêñ mĭn kơ bruă phung kahan êka, djiê êngiă, čiăng bi hrŏ klei ênguôt hnĭng anăn hŏng dŭm bruă ngă klă klơ̆ng, hlăm anăn mâo bruă mtrŭt bi hmar leh anăn mâo boh tŭ dưn bruă tui duah, bi mklin leh anăn bi klă klang phung lĭng kahan djiê êngiă dôk ka thâo anăn. Hlăm mmông mă bruă, Khua knŭk kna srăng ktuê dlăng knăm ba mdah boh tŭ klei bi klă ADN phung lĭng kahan djiê êngiă, mbĭt hŏng phung bi ala dŭm phŭn, dhar bruă jao boh tŭ klei bi klă ADN kơ 12 gŏ sang lĭng kahan djiê êngiă, jao hdră mkiêt mkriê prăk mâo ênoh 10 êklăk prăk hlăm sa pŏk leh anăn mđŭp brei hnư mnơ̆ng kơ dŭm gŏ sang lĭng kahan djiê êngiă. 

Pô mblang: Y-Ƀel Êban