Hluê si klei hưn mdah, klei blŭ mguôp hlăm klei kƀĭn, boh sĭt ti krĭng msăt boh lăn lŏ dơ̆ng bi mlih mpral, dleh ksiêm dlăng, hmăi klă anăp kơ klei mkăp brei leh anăn ênoh êa pui êwa čuh tar rŏng lăn, hlăm anăn mâo Việt Nam. Bruă klam hlăm wưng kơ anăp, Khua Knŭk kna Phạm Minh Chính mñă amâo brei kƀah klei mkăp brei êa săng, êa pui, amâo mâo brei kpăk bruă mkra mjing, mnia mblei, amâo brei luč klei hơĭt, luč klei êđăp ênang hlăm yang ƀuôn. Khua Knŭk kna Phạm Minh Chính mñă kơ dŭm bruă mkra mjing mnia mblei êa săng, êa pui săng jăk, amâodưi mkăm pioh, mđĭ ênoh, ngă mtŭk mtul anôk mnia mblei, dŭm anôk bruă djŏ tuôm nao hgŭm gang mkhư̆ klei tlĕ čhĭ găn knông lăn, ƀuah mkra ktang phĭt dŭm klei ngă soh.

Bi kơ wưng sui, Khua Knŭk kna mñă kơ Phŭn bruă tuh tia mnia mblei čiăng bi mguôp hŏng dŭm phŭn, dhar bruă, anôk bruă ksiêm duah dŭm hdră êlan čiăng hnưm mđĭ ai dưi čŏng pô kơ êa pui mơ̆ng lăn čar, msĕ si bi lu jơr phŭn mkăp leh anăn mđĭ hnơ̆ng klei čŏng pô kơ êa pui. Ksiêm duah mkŏ wĭt mphŭn mkăp klei mnia mblei êa pui, mđĭ ai dưi mkăm pioh êa pui mơ̆ng lăn čar, bi mâo djăp êa pui hlăm wưng sui.