VOV4.Êđê -  Hruê 16/3, Khua knŭk kna Phạm Minh Chính mă bruă hŏng Êpul grup êa pui êwa čuh ala čar Việt Nam (PVN) kơ bruă knuă thŭn 2021, 2 mlan akŏ thŭn 2022 leh anăn hdră kčah thŭn 2022. Khua knŭk kna Phạm Minh Chính bi mklă Knŭk kna, Khua knŭk kna mơ̆ng dŭm wưng mđing kơ PVN čiăng kơ êpul grup đĭ kyar hơĭt kjăp leh anăn tŭ dưn hĭn. Khua knŭk kna klă klơ̆ng tŭ ư hŏng dŭm hdră kčĕ, klei akâo mơ̆ng PVN hlăm mmông mă bruă. Hlăm anăn, mâo dŭm bruă ngă leh, leh anăn lŏ dơ̆ng dưi msir mgaih.

Hŏng dŭm bruă mâo gưl mâo klei dưi brei hdră êlan msir mgaih, snăn PVN bi hgŭm hŏng dŭm phŭn, dhar bruă, anôk bruă msir mgaih bi jih hlue si hdră klă klơ̆ng. Khua knŭk kna mtă kơ khua gĭt gai PVN mđĭ ai êpul knuă druh, phung mă bruă lŏ dơ̆ng bi hgŭm, bi tŭ ư, gĭr ktưn hgao klei dleh dlan, hŏng Đảng, Knŭk kna leh anăn mnuih ƀuôn sang msir mgaih bruă yuôm bhăn jing rơ̆ng bi knar êa pui êwa čuh êlâo hĭn leh anăn kơ hnơ̆ng sui, đru mkŏ mjing bruă duh mkra êngiê./.

H’Zawut pô mblang