Hluê si klei hưn, thŭn 2023, Êpul grŭp pui kmlă Việt Nam gĭr bi leh dŭm hnơ̆ng čuăn bruă klam hlăm bruă bi êran leh anăn mkăp brei pui kmlă kơ bruă duh mkra, hlăm anăn mâo boh klei kƀah pui kmlă hlăk knhal jih mlan 5, kŏ mlan 6 leh anăn ngă klei bi hrŏ hnơ̆ng ti krĭng Dưr.

Bi êran pui kmlă mâo êbeh 280 êklai Kwh, đĭ 4,5% mkă hŏng thŭn 2022. Bi ala kơ knŭk kna, Khua knŭk kna Phạm Minh Chính lač jăk, čih yap, bi mni kơ klei gĭr, boh tŭ dưn mơ̆ng Êpul grŭp dưi mâo đru mguôp yuôm bhăn hlăm boh tŭ dưn mbĭt lăn čar dưi mâo hlăm thŭn 2023. Khua knŭk kna mñă kơ EVN gĭr bi leh dŭm mta kñăm dưi jao hlăm thŭn 2024, mkăp brei djăp pui kmlă kơ klei đĭ kyar bruă duh mkra ala ƀuôn lăn čar. Mta kñăm prŏng hĭn jing amâo mâo brei kƀah pui kmlă kơ bruă mkra mjing, mnia mblei leh anăn ba yua, mta kñăm prŏng tal 2 jing bi djŏ hŏng ênoh anôk mnia mblei, ƀiădah ăt mâo dŭm hdră êlan hŏng phung knŭk kna dlăng ba.