VOV4.Êđê- Aguah mbrue (16/8), Khua knŭk kna Phạm Minh Chính lehanăn êpul ngă bruă mơ̆ng knŭk kna nao ksiêm lehanăn mă leh bruă hŏng Êpul grŭp dăng kông êlan kbưi lĭng kahan (Viettel). Viettel jing anôk duh mkra mrô 1 mơ̆ng bruă dăng kông Việt Nam lehanăn jing anôk duh mkra prŏng tal 4 hlăm lăn čar hŏng ênoh mâo ba wĭt giăm 150 êbâo êklai prăk/thŭn; prăk mnga mâo ba wĭt êlâo kơ tuh jia mâo nanao 40 êbâo êklai prăk/thŭn. Bi ala kơ Đảng, knŭk kna, Khua knŭk kna čih pioh lehanăn jih ai tiê bi mni kơ dŭm boh tŭ dưn phung knuă druh, khua kahan, lĭng kahan lehanăn mnuih mă bruă mơ̆ng Viettel ktưn mâo ba wĭt hlăm wưng leh êgao.

Čiăng bi leh jăk bruă čuăn hlăm wưng kơ anăp, Khua knŭk kna mtă Phŭn bruă lĭng kahan gĭt gai leh Êpul grŭp Viettel ngă jăk hĭn dŭm bruă cuăn, hlăm anăn mđing hĭn: Viettel năng jing gru bi hmô kdlưn hĭn mơ̆ng anôk knŭk kna duh mkra mă bruă tŭ jing hĭn, jing sa êpul grŭp tuh tia prŏng kơ lăn čar, hŏng klei mbruă, ênuk mrâo mâo ai bi ktưn prŏng hlăm ala čar lehanăn hŏng ala tač êngao./.

Pô mblang: Y-Khem Niê