Ti Hà Nội, Khua knŭk kna Phạm Minh Chính gĭt gai mmông mă bruă plah wah êpul khua êmua knŭk kna leh anăn Êpul hgŭm dŭm knơ̆ng bruă điêt leh anăn man dưn (SME) kơ boh sĭt klei ngă bruă mơ̆ng êpul hgŭm, êpul êya dŭm knơ̆ng bruă SME leh anăn dŭm hdră êlan ruh mgaih klei dleh dlan kơ dŭm knơ̆ng bruă.

Leh mđing hmư̆ klei hưn mdah mơ̆ng êpul hgŭm SME, dŭm knơ̆ng bruă leh anăn klei hlăk mblang, ba mdah dŭm hdră êlan mơ̆ng dŭm Phŭn, dhar bruă leh anăn khua kiă kriê dŭm knơ̆ng prăk, bi klă hlăm mmông mă bruă, Khua knŭk kna Phạm Minh Chính mñă klă, knŭk kna mâo nanao klei mđing hmư̆, kah mbha, gĭr čiăng mâo dŭm hdră êlan ruh mgaih klei dleh dlan kơ knơ̆ng bruă msĕ si hluê ngă dŭm hdră êlan bi kdung bruă tla prăk jia, prăk mưn lăn, bi hrŏ prăk jia, klei tla hnô, kñăm ruh mgaih klei dleh dlan, mtrŭt mđĭ klei đĭ kyar knơ̆ng bruă, bruă čhĭ mnia sang lăn, mtrŭt mđĭ klei mlih mrâo bruă ngă hră mơar knŭk kna, bi hơĭt wăl duh bi liê mnia mblei, đru kơ knơ̆ng bruă krŭ wĭt hmar, đĭ kyar kjăp.