VOV4.Êđê- Aguah mbruê 28/8, Khua knŭk kna Phạm Minh Chính mâo leh mmông mă bruă hŏng Êpul khua bruă Đảng čar Lào Cai. Blŭ hlăm mmông mă bruă, khua kiă bruă Đảng čar Lào Cai Đặng Xuân Phong brei thâo, Lào Cai jing jing čar dôk hlăm êpul ba anăp hlăm 14 čar krĭng dap leh anăn krĭng čư̆ čhiăng nah Dưr. Hnơ̆ng klei đĭ kyar bruă duh mkra hmar, kah knar hlăm wưng thŭn 1991 – 2021 mâo giăm 10% hlăm sa thŭn. Blŭ hlăm mmông mă bruă, Khua knŭk kna Phạm Minh Chính mñă klă, Lào Cai mâo lu klei găl hlăm lu mta bruă, ƀiădah ăt mâo dŭm klei dleh kpăk msĕ si: hnơ̆ng bruă duh mkra điêt, hnơ̆ng tŭ jăk klei đĭ kyar bruă duh mkra ka kjăp ôh.

Iêo mthưr ai dưi duh bi liê mđĭ kyar dôk mâo klei kpăk. Khua knŭk kna mtă kơ čar lŏ hur har leh anăn mđĭ kyar bruă duh mkra hmar, kjăp, rơ̆ng klei êđăp ênang, rơ̆ng răng mgang êlan knông lăn, bi mguôp leh anăn đru mtrŭt mđĭ knhuah gru bi mguôp plah wah 2 ala čar, plah wah 2 djuê ana Việt Nam leh anăn China, mkŏ mjing wăl răng mgang kjăp hlăm bruă lĭng kahan, bi mguôp, bi ktưn mđĭ kyar bruă duh mkra klă klơ̆ng leh anăn mâo boh tŭ dưn.

Pô mblang: Y-Ƀel Êban