Blŭ hlăm mmông mă bruă, Khua knŭk kna Phạm Minh Chính mñă klă, Bruă klei mrâo jing mnơ̆ng hâo hưn hlăm mặt trận dhar kreh mơ̆ng Đảng, hlăm anăn, Êpul hgŭm phung čih klei mrâo Việt Nam mâo bruă klam yuôm bhăn hlăm klei bi mguôp, bi mklin, mđĭ klei thâo bruă kđi čar, mtô mjuăt klei ngă bruă, knhuah mă bruă mơ̆ng phung čih klei mrâo.

Khua knŭk kna Phạm Minh Chính mơĭt klei hơêč hmưi jăk siam leh anăn yap yuôm bhăn, pah mni dŭm boh tŭ dưn, klei đru mguôp mơ̆ng Êpul hgŭm phung čih klei mrâo Việt Nam hlăm kluôm ala. Khua knŭk kna mñă kơ Êpul hgŭm phung čih klei mrâo Việt Nam čŏng pô hĭn hlăm bruă tă hdră kơ phung čih klei mrâo mđĭ hĭn klei ksiêm duah hdră êlan leh anăn hur har nao hgŭm hlăm bruă hâo hưn hdră êlan, mtrŭt mđĭ klei mlih mrâo, mbruă hlăm mta phŭn, đru mđĭ hnơ̆ng klei hâo hưn, phung ktuê dlăng, mkŏ mjing êpul êya phung čih klei mrâo thơ̆ng kơ bruă, ƀư̆ mkra dŭm klei amâo mâo hlăm klei mĭn ngă bruă, mtrŭt mđĭ boh tŭ dưn hlăm bruă klei mrâo. Bruă klei mrâo srăng nao êlâo hlăm bruă hmao ƀuh, pah mni dŭm mta mrâo, mnuih jăk, bruă jăk, mă klei jăk, hwiê bruă jhat, mă klei jăk msưh kdŭn klei amâo mâo jăk, mkŏ mjing boh kdrŭt, klei bi lar hlăm êpul êya yang ƀuôn. Ngă jăk bruă klam ktuê dlăng, hlăk mblang, mkăp brei klei hưn klă sĭt.