Tui si khua knŭk kna, klei bi hgŭm duh mkra mnia mblei, klei duh bi liê bruă kreh knhâo, klei mlih mrâo hŏng klei mbruă... jing kmeh gơ̆ng pioh mđĭ hĭn klei bi mguôp dua ala čar, nao hlăm hdră êlan bi hgŭm kluôm dhuôm, lehanăn mâo klei tŭ dưn hĭn, msĕ si klei Khua gĭt gai Đảng Nguyễn Phú Trọng lehanăn khua mil čhil Mi Joe Biden čang hmăng. Khua knŭk kna Phạm Minh Chính čang hmăng kơ Mi lehanăn phung duh mkra mơ̆ng Mi, mđrăm mbĭt hŏng Việt Nam bi sĭt mta kñăm lač anăn, mbĭt hŏng bruă mdrơ̆ng hŏng klei yan adiê bi mlih, klei ênoh mnuih đĭ mduôn lu, klei ruă tưp, klei luis hrŏ ngăn dŏ mnơ̆ng čŏng mâo...

Êjai Việt Nam dôk tuôm hŏng lu klei dleh dlan, leh sa wưng sui kyua klei bi blah ngă bi rai, lăn čar hlăk đuĕ nao kơ klei đĭ kyar, klei duh mkra dôk bi mlih, boh prŏng klei duh mkra adôk điêt, ai dưi tŭ hŏng djăp mta klei lông dlăng mơ̆ng êngao jing awăt. Blŭ klah čŭn ti mmông mă bruă khua knŭk kna bi mni kơ dŭm klei blŭ mơ̆ng phung khua kiă kriê bruă duh mkra mơ̆ng Êpul gơ̆ng klei duh mkra mnia mblei Mi - ASEAN; Khua knŭk kna čang hmăng kơ dŭm phŭn dhar bruă lŏ dơ̆ng ksiêm duah, tŭ mă, lehanăn mâo klei blŭ wĭt lač, mjing djăp klei găl kơ phung duh mkra./.