Tlam mbruê 14/5, Khua hlăm Phŭn bruă kđi čar, Khua knŭk kna Phạm Minh Chính mâo leh mông mă bruă hŏng khua gĭt gai ƀuôn prŏng Cần Thơ čiăng bi klă boh sĭt klei ngă bruă mkra mjing, mnia mblei, duh bi liê bruă mkŏ mkra, dŭm klei dleh dlan, kpăk gun leh anăn dŭm hdră êlan mtrŭt mđĭ klei đĭ kyar ti ƀuôn prŏng.

Bi klă hlăm mmông mă bruă, Khua knŭk kna Phạm Minh Chính čih yap, pah mni dŭm klei gĭr leh anăn boh tŭ dưn dưi mâo mơ̆ng bruă Đảng, bruă sang čư êa, lĭng kahan leh anăn mnuih ƀuôn sang ƀuôn prŏng Cần Thơ, đru mguôp tŭ dưn mbĭt hŏng lăn čar bi hơĭt bruă duh mkra, ksiêm dlăng klei prăk luč ênoh, rơ̆ng dŭm klei bi kna, mtrŭt mđĭ klei đĭ kyar, mđĭ hnơ̆ng klei hdĭp leh anăn ai tiê mnuih ƀuôn sang. Bi kơ bruă klam hlăm wưng kơ anăp, Khua knŭk kna mtă kơ ƀuôn prŏng lŏ dơ̆ng ktuê dlăng, thâo klă boh sĭt, hơĭt ai tiê, čŏng pô, hŏng klei mbruă, mgaih msir tŭ dưn dŭm bruă klam, bruă mjêč, dŭm klei dôk mâo, kñăm ruh mgaih klei dleh dlan, kpăk gun kơ mnuih ƀuôn sang, knơ̆ng bruă čiăng mtrŭt mđĭ bruă mkra mjing, mnia mblei, mkŏ mjing bruă mă, hdră duah ƀơ̆ng kơ mnuih ƀuôn sang.