VOV4.Êđê - Leh klei ksiêm dlăng, Khua knŭk kna Phạm Minh Chính hŏng êpul ngă bruă mâo leh klei mă bruă hŏng khua gĭt gai ƀuôn prŏng Hồ Chí Minh kơ klei đĭ kyar bruă duh mkra ala ƀuôn mlan 7, 7 mlan akŏ thŭn leh anăn duh hdră duh bi liê bruă knŭk kna ti ƀuôn prŏng. Hưn mdah hlăm mmông mă bruă, Phan Văn Mãi, khua bruă sang čư êa ƀuôn prŏng Hồ Chí Minh brei thâo, klei đĭ kyar GRDP 6 mlan akŏ thŭn ti ƀuôn prŏng Hồ Chí Minh đĭ 3,82%, hlăm klei đĭ kyar wưng tlâo mlan tal 2 đĭ 3 blư̆ mkă hŏng wưng tlâo mlan tal 1. Bi kơ bruă klam dŭm mlan knhal jih thŭn, ƀuôn prŏng srăng knăm kơ dŭm hdră êlan gĭr bi mâo 19 hnơ̆ng čoh čuăn bruă duh mkra – ala ƀuôn mơ̆ng akŏ thŭn mâo Êpul gơ̆ng bruă ƀuôn sang bi klă leh.

Bruă rơ̆ng kjăp jing gĭr ktưn bi mâo hnơ̆ng đĭ kyar msĕ mta kñăm jing 6 – 6,5%. Blŭ hlăm mmông mă bruă, mbĭt hŏng klei pah mni dŭm boh tŭ dưn dưi mâo, Khua knŭk kna ăt mtă kơ ƀuôn prŏng Hồ Chí Minh lŏ dơ̆ng ksiêm dlăng, mgaih msir klei dleh dlan, klei kpăk hlăm bruă mkra mjing, mnia mblei hlăm alŭ wăl, ksiêm dlăng kluôm ênŭm, bi mbŏ dŭm hdră êlan mđĭ hnơ̆ng tŭ jăk, mkŏ mjing bruă sang čư êa ƀuôn prŏng, bi hơĭt wăl duh bi liê, mnia mblei, gĭr bi mâo leh anăn êgao 19 hnơ̆ng čoh čuăn bruă duh mkra ala ƀuôn thŭn 2022. Khua knŭk kna ăt jao bruă klam klă klơ̆ng kơ dŭm phŭn, dhar bruă čiăng bi mguôp, mgaih msir hluê si klei dưi dŭm klei bi êdah, klei kčĕ mơ̆ng ƀuôn prŏng Hồ Chí Minh.

Y-Ƀel pô mblang