VOV4.Êđê- Tlam mbruê, lŏ dơ̆ng klei nao čuă, mă bruă ti čar Bình Phước, Khua knŭk kna Phạm Minh Chính mbĭt hŏng êpul ngă bruă mơ̆ng knŭk kna mâo leh anăn mmông mă bruă hŏng êpul khua bruă Đảng čar Bình Phước kơ boh sĭt klei đĭ kyar bruă duh mkra ala ƀuôn thŭn 2021, 2 mlan akŏ thŭn 2022, hdră tă, hdră êlan đĭ kyar bruă duh mkra ala ƀuôn thŭn 2022 leh anăn dŭm thŭn kơ anăp. Blŭ hlăm mmông mă bruă, Khua knŭk kna Phạm Minh Chính mtă kơ khua gĭt gai kmeh gơ̆ng bruă sang čư êa čar Bình Phước lŏ bi lar klei čŏng ngă bruă, čŏng gĭr ktưn mơ̆ng kngan pô, klei mĭn pô, duah djăp hdră mđĭ prăk hrui wĭt, bi hrŏ prăk duh bi liê, gang mkhư̆ klei luč liê mang leh anăn klei amâo jăk.

Bi kơ dŭm bruă ngă klă klơ̆ng, Khua knŭk kna mtă čiăng tui ngă tŭ dưn hdră “Hdĭp êđăp ênang, hŏng klei mbruă, ksiêm dlăng tŭ dưn klei ruă tưp Covid-19”, ngă jăk hdră krŭ wĭt leh anăn mđĭ kyar bruă duh mkra ala ƀuôn. Lŏ dơ̆ng hyuă kjăp, bi klă hdră mtrŭn mơ̆ng klei kƀĭn kluôm Đảng čar tal 11 hŏng mta kñăm jing 2 mta bruă êdah êdi kơ bruă mkŏ mkra, mlih klei ngă hră mơar bruă knŭk kna leh anăn mđĭ kyar ai dưi.

Pô mblang: Y-Ƀel Êban